2Cor 11 | WSK | STEP | Aninga angamang nina kawus mal ale yam iki sagaral se kari ngualara kota numi patawoso wore iwita den saki balik se ikialko.

2 Corinthians 11

Paul apostle kawel nunga dugu duap wetang te balam

1 Aninga angamang nina kawus mal ale yam iki sagaral se kari ngualara kota numi patawoso wore iwita den saki balik se ikialko. 2 Kaem ninguru ningarkiwoso iwitata, ani ningarki kuawuwasam. Mu awuk, kari bo ko nanawus manarso ale balso, ni kari umutang toko ma balso ale arikuawuwoso iwitata, ani kari suwanta Kristus nina talko balem, ale ani nina imet itiwik ko bagara diram nunguningkiri wore iwita nu tuekko. ^{▼▼2 Cor 11:2 Kris alo mu Kristus ko imet iwitata: Eph 5:26-27.} 3 Bare ani nguangasam. Ma memek ko kawel te Eve kulam iwitata, kariimet sang ninga kulurmon se ninga ikia geraguk, se ikia motam motam diram te baga se Kristus ko la bagaralko wore nibiring tual bore ko.

4 Ani nguangasam. Mu awuk, kari awiriya den ninga manarso bare nina tairatela tasan ale nengemang ningi betesan! Kariimet sang nengete taisan ale Jesus ko dugu duap ana balsan iwita me balu gilingisan, kigilik balsan. Se nina munan umutang te den gilalong se bur kigilik tasan, den gilalong yawara se Korang Bur iru la nina ikiman ale taman mu iwita mena, kilimik wore tasan. 5 Bare ani ikisam, nenenga “apostle bibiya” sumu ani me ta aga kiaman, se ani nuna nobowa ningi iwita mena! 6 Ani munakirikko me terong agi, bare ani ikia ago terong maem! Se nina aninga munan suen biya te mel mu wetang te ari sapaman. ^{▼▼2 Cor 11:6 Paul ko den apura: 1 Cor 2:1, 13.}

7 Agi ani nina te ninga patawirikko aimi ira kutuwurem ale Kaem ko den gilalong yawara ko koma mena am ninga manem, bare uwuta mu memek e? 8 Tom ani ninga ningi ura ilukasam, mu wonong saki ko Kris alo aga sangarukasan, mu ani nina te ninga sangikko nuna nongote mel am tagikasam iwitata. ^{▼▼2 Cor 11:8-9 Macedonia Kris alo Paul sangarukasan: Phil 4:15-18.} 9 Ani nengerak baga se mel ko tukunang akasam, mu ani nina ikup me ningarukasam. Mena. Kris launuria Macedonia taiman mu aga sangarukasan. Se ulengkala bitakasam iwitata, udagi betelatala ani ikup bo me ningarikkowo. 10 Kristus ko den nunguning agate aniso se ani balsam, Achaia ningi kari bo ta ani Kristus ko dugu duap ko koma mena balsam ale te ko amilmilasam imi me menawurokko!

11 Se awuk a? Ani butata betesam mu ani nina me ninga kuesam e? Mu Kaem ikiso ani ninga kuesam! 12 Se ani bitawasam mu am butata bitawirikkowo! Umutang te “apostle bibiya” umutang balmon, ana ura koma suwanta betesan pa mamon ale te nunumi patawomonko lage bo mena. 13 Mu awuk, kari umutang apostle kawel, se ura kari kawel alo. Nuna kawelasan ale Kristus ko apostle ko nunumi balsan. ^{▼▼2 Cor 11:12-13 Apostle se prophet kawel: 2 Peter 2:1-3; Jude 11.}

14 Bare ana mel mu ko me biririkinakko. Nuna munan iru bo me betesan. Mu awuk, Satan kota kaweloso ale numi nikim biya ko engel bo ko geragoso. 15 Se ko ura kariimet kawelasan ale munan ningo ko ura kariimet iwita geragasan tala, bare ana mu ko me biririkinakko. Udagi te nuna kawel betesan mu ko koma diram tamonko.

Paul apostle ura te ikup suen biya gikaso

16 Ani akingtala balsam, nina bo ta ani kari ngualara ko me aga balalko! Bare nina butata aga ikisan agi mu, kari ngualara nungumik te betesan iwitata am agarki sagaral se aimi katir patawirikko. 17 Kari Biya ani iwita balikko me aga manarso, bare ani kari ngualara iwita aimi aip patowasam. 18 Kari suen biya ali imi ko munan te nunumi patowasan, se ani betela am bitirikko. 19 Mu awuk, nina kariimet ikia bibiya, se mu ko nina kariimet ngualara nunga den ikialko ninguru nedegewa tagisan! 20 Bare mu la mena. Nina kari noko dungan kariimet ko ninga awuso agi, ninga mel suen la menawuso agi, ko kawel te ninga giso agi, mel yam ko ninga beteso agi, nogol te ninga moso agi, bare nina am kawus masan se nu butata ninga beteso! 21 Bare ani mu dolasam, ana “nasokel mena”, se munan bibiya bo suwuta ninga ningi me betera se!

Bare anapeya munan kariimet sang me ko nguangasan, am te nunumi patowasan, mu ani betela munan mu ko am aimi patawirikko - bare ani aking kari ngualara iwita munakawasam! 22 Nuna Hebrew agi, bare ani agotala Hebrew kari. Nuna Israel agi, bare ani agotala Israel kari. Nuna Abraham ko gue te agi, bare ani agotala. 23 Nuna Kristus ko ura kari agi, bare ani kari ngualara iwita munakasam ale balsam, ani nunga kiarem. Ura aora ta te nunga kiarem. Se tom suen biya talipara ningi namara, se tom suen biya aga mora lilumara, se tom suen biya kua namirikko koma iwita wore te nunga kia saperem. 24 Juda alo nunga munan te, whip te, aga lilumakasan, agarak nama ko tom 39 te diram aga bitakasan. Se munan imitang tom 5 ko angimik te aratam. ^{▼▼2 Cor 11:24 Juda nunga munan te lilumaman: Deut 25:3.} 25 Se Rome alo tom ilagala suwan ko, bu te aga lilumaman. Tom suwanta ko kari sang manga te aga usagaman. ^{▼▼2 Cor 11:25-26 Bu te lilumaman: Acts 16:22. Manga te usagaman: Acts 14:19. Dal te ikup arigam: Acts 27:44. Momonko ago kaeman: Acts 9:23; 14:5; 21:31.} Tom ilagala suwan ko dal agarak nama magaram se worem suwanta, turom suwanta ani gagi tuagu biya te dal sarengam se ya lagakasam.

26 Tom suen biya ani lage awar aolak ilu lagakasam. Ani yu lom, se tere daong kari, se aga gue suwan Juda alo, se sor saki ko kariimet, mu suen la nuguting te memek taikko koma iwita wore lagakasam. Wonong bibiya ningi, sor kariimet mena te, gagi luan te, am memek kuring ningi diram lagakasam. Ale Kris kawel saki nuguting te memek taikko koma iwita wore lagakasam. 27 Ani ura kowar duap duap bitakasam. Ale tom saki me anikasam, tom saki na ko kuakasam, yu ko kuakasam. Tom suen biya inang yu ko tukunang akasam. Ale kawam sasal mena, am matangi sor tuagu te anikasam, ale angimik guang mena se birigi lagakasam.

28 Ale mel mu la mena. Tom suen biya ani Kris alo wonong wonong bagakasan mu nunga ikia ninguru aga moa lagakaso. 29 Bo sokel mena akaso, mu ani agata asokel menara iwita aimi ikikasam ale sangikko ikia aga moakaso. Aking bo lage memek kasurukasan se te nama dagulukaso, mu ani angamang ninguru yaman ikikaso.

30 Bare ani aimi patawirik, mu ani munan ani asokel mena mu aga wetang te beteso mu la ko aimi patawirikkowo! 31 Se nanga Biya Jesus ko Nuet se ko Kaem tala, tom suen biya nu nup patowara ko, mu ani me kawelasam mu ikiwoso. 32 Ko kausa bo iwita, ani Damascus bagerem, se supuling biya, nu King Aretas bowa ningi bagara, mu kager kari nunga maonam se aninga ilumonko wonong ko kar korang ago sanami namaman. Bare Kris kariimet saki sise aromemek bo ningi aga beteman se daigem, se mayang te kaloman ale kar ko kuring gotek bo te aga garukuman, se kar buring ko nama kaperem, ale wonong mu ko supuling kuting ningi aratem ale nagurem. ^{▼▼2 Cor 11:32-33 Paul Damascus wonong ko kar buring ko nama kaparam: Acts 9:23-25.}

33